العيد هلّ / وغطرفن الغنادير
والفل زيّن مجلس اهل السعادة

كل ن معيد بين ربعه وفي خير
الا رجال ن يومهم في جلادة

اللي على الحد الجنوبي مساهير
وعيدهم قدح الفشق من زناده

نوماسهم اغنى الشعر والتعابير
رجال سلمان الحزم / والعماده

وقفاتهم فاقت جميع التصاوير
اما يكون النصر والا الشهادة

لبيه يا صفوة رجال ن مناعير
لبيه يا حد الشرف والسيادة

يا بو فهد جيشك صقور مغاوير
منهو يشابه للصقر في هداده..؟؟

جيشك معه خبره وحنكه وتدبير
في ساعة الهيه يبين / عتاده

اكرم وحوش البر وتشبع الطير
واعلن عدو الله منهم حداده

هم عيدنا هم فرحنا هم لنا غير
وفعولهم تسمو بمعنى الاشادة

على العدا نار وسموم واعاصير
ولجارهم برد وسلام ورفاده

فالعيد/ بوجيه الرجال المناعير
هم عيدنا عز الشعب والقيادة