العيد تحرير العرب من يد الروم
واكلاب فارس والدواعش من الشام

والحال حال اللّي عن الزاد محروم
والشوق شوق اللي له سنين ما نام

والقلب قلب الأرض صابر ومالوم
لو ينجرح ما صاح جرحه ولا لام

من كبّر الغايات ما يقرب النوم
ولا يحصد الواقع زرّاع الاوهام

يا خوك انا بوصيك لا يلحقك لوم
واقضب وصاتي تِنْجِيَك من الاعدام

القرب من ولد الخنا سيف مثلوم
سيف" خشب قم قَلِّطَه لأهبلٍ سام

والاجودي مثل الذهب فإجزل السوم
خلّك معَه ضرغام تلقاه ضرغام

والشيخ من يفزع على ساير القوم
في حب ربعه شاخ والمجد قدام

مدة كريم"غير عن مدة ارخوم
واحد عطا بالسر وآخر للاعلام

والحظ باللي يحفظ الفرض والصوم
متبسّمٍ لو جارته سود الايام

الطّيَّب اللي سامح ويبتسم دوم
والعاقل اللي يبخص الحزن ما دام

والبؤس والتنكيد والقر للبوم
لو قام همه قام وان طاح ما قام

والشعر لو ماكان بالجزل مختوم
أحرق ورقه واحبسه حبر الاقلام

والمال ما يفرج عن الضيق مهموم
لي صار همّك وسط الاضلاع محتام

والفقر ما يبعد عن الجود زيزوم
دايم على مد الجزيلات قوّام

عشرين عام وصاحبك بارع العوم
ببحور صبري والمفارق والآلام

ما ذقت من خمر الردا كأس مسموم
ولا خالطت ريح الغواني لي انسام

اشرب جروح واضحك وآكل اهموم
واقطف من أعْذوق المواجع تبسّام