بعض البشر راحتك في سماعه
حكيه حكم والطيب له عوايد
وبعض البشر راحتْك ف انقلاعه
شرّ و مضرّه ما وراه فايد

من يعترف في غلطته شجاعه
يغفى ولو جرحه نزيف كايد
ومن يصمل بذنبه كسر يراعه
يصبح على جيد الندم قلايد

الحبّ نور الصّبْح في شعاعه
يشعل بوسط قلوبنا وقايد
وحبّك بذَر فاختار زين قاعه
لا تتْركَهْ بارض الصبخ طرايد

واكرم كبيرك قدره وراعه
تجزى بما تعمل بخير زايد
ورضّع صغيرك بالوفا رضاعه
اليا كبر بايجيب لك فرايد

والمركب اللي مأرتفع شراعه
طرّاشته طرْشى بغير قايد
لا تركبه خذ لك مِنَه مناعه
تغرق معه واتضيع حيل بايد

والتاجر اللي سمعته بضاعه
ما يخْسره لو كبَّر الوسايد
من يمتلك صبرٍ مَعَ قناعه
ما تكْسرَه طيحه ولا مصايد

نبع القصيد اليا نوى القطاعه
ايصوم عنك و لا نوى يعايد
لا تجبره تكسر ترى ذراعه
ياتي على كيفه ذهب جدايد

وجيت بقصيده مو قصيد ساعه
هاذي تسمّى شيخة القصايد

وحده لكن تسوا شعر جماعه
ماقد كتبها غير قلب عايد